Sizin sağlamlığınız bizim məqsədimizdir

Mərkəzi Klinika Azərbaycanın səhiyyə tarixində özünəməxsus yeri olan, yarım əsrdən artıq fəaliyyət göstərən nüfuzlu tibb müəssisəsidir. Əsası 1965-ci ildə qoyulan klinika uzun illər ərzində dövlət və ictimai xadimlərə yüksək səviyyəli tibbi xidmət göstərmiş, xalq arasında "Leçkomissiya" adı ilə tanınmışdır.

1999–2001-ci illərdə Ümummilli Lider Heydər Əliyevin təşəbbüsü ilə xəstəxana əsaslı şəkildə rekonstruksiya olunmuş, beynəlxalq standartlara uyğun yenidən qurularaq Mərkəzi Klinika adını almışdır. 2007-ci ildən etibarən klinika Azərbaycan Respublikası Prezidentinin Xüsusi Tibb Xidmətinin tabeliyinə verilmişdir. Hazırda Mərkəzi Klinika Xüsusi Tibb Xidmətinin rəisi, dünya şöhrətli alim və həkim, nüfuzlu ictimai xadim, akademik Cəmil Əliyevin rəhbərliyi ilə yeni inkişaf mərhələsini yaşayır.

Bu gün Mərkəzi Klinika Bakı və Gəncə şəhərlərində fəaliyyət göstərən xəstəxana, ambulatoriya və stomatoloji mərkəzləri vasitəsilə əhaliyə yüksək texnologiyalı, müasir və kompleks tibbi xidmətlər təqdim edir. Vaxtilə ölkəmiz üçün əlçatmaz hesab edilən bir çox tibbi xidmətlər və mürəkkəb cərrahi əməliyyatlar, o cümlədən müasir ürək əməliyyatları, angioqrafiya, angioplastika, orqan transplantasiyası (ürək, böyrək, qaraciyər, sümük iliyi və s.), süni mayalanma, eləcə də çoxsaylı mürəkkəb ümumi cərrahiyyə əməliyyatları bu gün klinikada uğurla icra olunur.

Son dövrlərdə Mərkəzi Klinikada ölkəmizdə və bütövlükdə Cənubi Qafqaz regionunda ilk dəfə olaraq meyit donorundan ürək transplantasiyası uğurla həyata keçirilmiş və bununla da milli səhiyyə tarixində mühüm nailiyyət əldə edilmişdir.

Bu gün Mərkəzi Klinika milli səhiyyənin inkişafında aparıcı rol oynayan, innovativ tibbi xidmətləri, peşəkar həkim heyəti və pasiyent məmnuniyyətinə əsaslanan fəaliyyəti ilə cəmiyyətin etimadını qazanan, etibarlı və nüfuzlu tibb brendidir.